സ്റ്റിൽ ഇമേജുകളെ മൂവിങ് വീഡിയോകളാക്കാം; ‘സിനിമാഗ്രാഫ് ലോറ’ ഫീച്ചറുമായി എൽടിഎക്സ്-2.3

സ്റ്റിൽ ഇമേജസ് മനോഹരമായി ലൂപ്പ് ചെയ്യുന്ന വീഡിയോകളാക്കി മാറ്റാൻ സഹായിക്കുന്ന പുത്തൻ എഐ സാങ്കേതികവിദ്യ അവതരിപ്പിച്ചു. ലൈറ്റ്‌റിക്സ് (Lightricks) കമ്പനിയുടെ പ്രമുഖ ഓപ്പൺ സോഴ്സ് വീഡിയോ മോഡലായ എൽടിഎക്സ്-2.3 (LTX-2.3)-ന് വേണ്ടിയാണ് ‘സിനിമാഗ്രാഫ് ലോറ’ (Cinemagraph LoRA) എന്ന പുതിയ ഫീച്ചർ ലഭ്യമാക്കിയിരിക്കുന്നത്.

ഒരു ചിത്രത്തിലെ ഏതെങ്കിലും ഒരു പ്രത്യേക ഘടകം മാത്രം ചലിക്കുകയും, ബാക്കിയുള്ള പശ്ചാത്തലങ്ങളെല്ലാം ഒട്ടും അനക്കമില്ലാതെ ലോക്ക് ചെയ്തു നിർത്തുകയും ചെയ്യുന്ന ‘സിനിമാഗ്രാഫ്’ ശൈലിയിലുള്ള വീഡിയോകൾ നിർമ്മിക്കാൻ ഈ ഫീച്ചർ സഹായിക്കും.

സാധാരണ വീഡിയോ എഐ മോഡലുകളിൽ ഒരു ചിത്രത്തെ വീഡിയോയാക്കി മാറ്റുമ്പോൾ അതിന്റെ ബാക്ക്ഗ്രൗണ്ട് ആവശ്യമില്ലാത്ത രീതിയിൽ ചലിക്കാറുണ്ട്. ബാക്ഗ്രൗണ്ടിനെ ഒരേ നിലയിൽ അനക്കാതെ നിർത്തുക എന്നത് ഇത്തരം മോഡലുകൾ നേരിടുന്ന വലിയൊരു വെല്ലുവിളിയാണ്. എന്നാൽ, സിനിമാഗ്രാഫ് ലോറ മോഡൽ ഡിഫോൾട്ടായി തന്നെ പശ്ചാത്തലം പൂർണ്ണമായും നിശ്ചലമാക്കി നിർത്താൻ പ്രത്യേകം പരിശീലനം ലഭിച്ച ഒന്നാണ്. ഇതിലൂടെ നിങ്ങൾ ആഗ്രഹിക്കുന്ന ഭാഗത്ത് മാത്രം തികച്ചും സ്വാഭാവികമായ ചലനം കൊണ്ടുവരാൻ സാധിക്കും.

ഇൻസ്റ്റാഗ്രാം റീലുകൾ, ഡിജിറ്റൽ പരസ്യങ്ങൾ, ക്രിയേറ്റീവ് ആർട്ട് എന്നിവ ചെയ്യുന്നവർക്ക് കുറഞ്ഞ സമയം കൊണ്ട് ആകർഷകമായ ലൂപ്പിംഗ് വീഡിയോകൾ നിർമ്മിക്കാൻ ഈ പുതിയ അപ്‌ഡേറ്റ് വഴി സാധിക്കും. ചിത്രത്തിലെ ചലനവും ക്യാമറ സ്റ്റെബിലിറ്റിയും കൃത്യമായി നിലനിർത്താൻ എൽടിഎക്സ്-2.3 യുടെ ഈ പുതിയ ഫീച്ചറിന് പ്രത്യേക ശേഷിയുണ്ട്.